ચાલ ને, મોઢું જરા મલકાવ ને!
કેટલા પંપાળવાના ઘાવને?!
ભૂલવા પડશે પુરાણા દાવને,
લે, ફરીથી જાતને અજમાવ ને!
રોજ શું આવી રીતે આવી ચડો?!
આંસુઓ ક્યારેક પાછા જાવ ને!
હોય વહેવું તો બધું ખમવું પડે!
કંઈ નડે નહિ લાંગરેલી નાવને;
એક દિ' ઊંચાઈને પામી જઈશ;
રોજ થોડી પાંખને ફેલાવ ને!
સ્હેજ શરમાઈ નજર નીચી કરી;
ઢાળ તેં આપી દીધો ઢોળાવને!
તું મળે તો ક્યાં બીજું કંઈ જોઈએ?
ઠોકરે મારું બધા સરપાવને!
: હિમલ પંડ્યા
No comments:
Post a Comment