લગાગાગા લગાગાગા લગાગા
સપન જે આંખમાં વાવી ગયા છે,
હૃદયને એ હવે ફાવી ગયા છે.
અવિરત આવતા હુંપદના મોજા,
અડગ દરિયાને સરકાવી ગયા છે.
તમારા શબ્દના હળવા ટકોરા,
પ્રણયના દ્વાર ખખડાવી ગયા છે.
અધર્મીઓ ધરમ પર ત્રાટકીને,
મહાભારતને સર્જાવી ગયા છે.
ભવોભવથી તમારી ચાહના છે,
આ જન્મે એટલે આવી ગયા છે.
-- દિલીપ ચાવડા 'દિલુ' સુરત
તડકાને ઈસ્ત્રી કરવામાં સાંજ પડી ગઈ
મોં માગ્યાં મોતે મરવામાં સાંજ પડી ગઈ
પાણી પાણી પાણીની ઝંખાઓ જાગી
ચિતરેલાં સરવર તરવામાં સાંજ પડી ગઇ
ભાષાનાં ભંગાર ઉપર ઊભાં છે કવિઓ
છંદોનાં દાદર ચડવામાં સાંજ પડી ગઈ
આંખોમાંથી અંધારાનાં ફળ ખરતાં પણ
ફાટેલાં ખિસ્સા ભરવામાં સાંજ પડી ગઈ
તું ઢોલિયા ઢાલી ચાલ્યો દેશ અજાણ્યે
ગઝલોના દીવા ધરવામાં સાંજ પડી ગઈ
- અનિલ વાળા
