દોહો
રુદ્રાણી રુદિયે રહો, ( અને ) માં તું રોમ રોમ રવરાય
આશાપુરી અરજ સુણો, (મા) મારગ બતાવો મોમાય ...
છંદ : ત્રિભંગી
સમરું રુદ્રાણી, વંદુ વાણી, પર્ણે પર્ણે પરમાણી
નજરે ખોડાણી, તું રોકાણી, ડાળે ડાળે ડોકાણી
પ્રગટે તું પાણી, જીભે જાણી, મુખડે મુખડે મલકાણી
દેવી દર્શાણી, તંબૂ તાણી, રુદિયે રુદિયે રુદ્રાણી ...
રગેરગમાં રાતી, થર થર થાતી, વમળ વમળમાં વરતાતી
વાદળ થૈ જાતી, ગોરંભાતી, લહર લહરમાં લહેરાતી
અંબર આખાની, ચાદર થાતી, ચૌદે લોકે ચર્ચાણી
દેવી દર્શાણી, તંબૂ તાણી, રુદિયે રુદિયે રુદ્રાણી...
મહામાય રવેચી, આશાપુરી, કચ્છ ધરાની કુળદેવી
રહે ના આસૂરી, દેખત દૂરી, ચિંતા સેવે માં જેવી
ચેતે ચાતૂરી, તાતાતૂરી, વેદે શાસ્ત્રે વખણાણી
દેવી દર્શાણી, તંબૂ તાણી, રુદિયે રુદિયે રુદ્રાણી ...
ભક્તોનાં ભેળી, લેતી તેડી, કાયમ બનતી તું કેડી
હજાર હથેળી, લાખ નવેલી, મલક બધાની તું મેડી
માવો કહે માડી, દઇને તાળી, મદદે આવો મર્દાની
દેવી દર્શાણી, તંબૂ તાણી, રુદિયે રુદિયે રુદ્રાણી ...
મા રુદિયે રુદિયે રુદ્રાણી .
- માવજી એમ આહીર 🌱