ગઝલ

ક્યાં છે દવા મારી,હવે જીવાય ક્યાં છે?
પાલવ તણી ટાઢી હતી,એ છાંય ક્યાં છે?

નાહક સુરા લાવ્યા તમે,આઘા રહો ને;
વીતી ગયા વરસો;હવે એ લ્હાય ક્યાં છે??

ઓલ્યા ઈશારાથી જ બોલાવો હવે તો;
ગાયબ થયો છે કંઠ,હૈયું ગાય ક્યાં છે?

ખત છે ઘણા,ને ફૂલ એ ભીંતે મઢેલું,
અસબાબ તારો ઘર મહીંથી,જાય ક્યાં છે?

મેં પણ મનોમન હાર માની છે ખુદાથી;
એ છે ભલે મંઝિલ,કશે પણ દેખાય ક્યાં છે?

દરદો ય પારાવાર આપો ને મજાથી;
આંખો ય છે સૂકી હવે,ભીંજાય ક્યાં છે?

હૈયા મહીંથી કાઢજો મા હોં 'અગમ' ને;
આ પ્યાર પણ સાચો ફરીથી થાય ક્યાં છે??

-શૈલેષ ચૌધરી 'અગમ'