ગીત

*યાદ છે ?*

મારી આંખથી મિલાવી તારી આંખ તું મજાની કેવી વાતો કરતી'તી એ સજની, યાદ છે ?

સ્નેહ સુવાસો લઈને દિલમાં ફૂલ ગુલાબી ખીલ્યાં,
પ્રેમ કરી બન્ને જણ ઊર્મિ બાગ મહીં રે ઝૂમ્યા;
દિલને આંગણે તારાં પગલાંનો નાદ છે !

સર્વ જગા યાદોથી ભીની, તારું સ્મરણ ઝાકળમાં,
મોર ટહુંક્યા સજની, તારી યાદ થઈ વાદળમાં;
તારી યાદનો વરસ્યો દિલમાં વરસાદ છે !

ઝરણું પવનને કહેતું ના કર શોર હવે ઉલ્લાસી,
અને પવન કહેતો કે આ તો ઉમંગ છે સુવાસી;
આપણા સ્નેહનો આ મીઠો સંવાદ છે !

*— પ્રદીપ સમૌચા*