ગઝલ

સઘળી ઇચ્છાઓને ખૂબ જ સિફતપૂર્વક ટાળી છે ,
સપનાઓની નાત અમે તો ભડભડ ભડકે બાળી છે.

વાટ જુએ છે એ કુંપળની ,એને જઈ સમજાવે કોણ ?
સઘળાં રસ-કસ સૂકાયા છે ,એ  તો સૂક્કી ડાળી છે.

એનાં માટે  મથવું  સાવે નક્કામું છે , છોડી  દે ,
એ ના થાશે ઉજળો, એનાં મનની ભીંતો કાળી છે

એ ખેંચાતી જાય અવિરત ; આશય બસ એને મળવું
ધસમસતી નદીઓ સાગર કાંઠેથી પાછી વાળી  છે

રાત -દિવસનો નાતો છે એ છોડી અમને જાશે ના ,
પીડાઓને પંપાળીને એવી રીતે પાળી છે !

~શબનમ