ગઝલ

બધાએ   કહ્યું : 'આ મનોરમ્ય  સ્થળ  છે !'
આ બાજુ તરસ છે આ બાજુએ જળ છે !

ચરણ  મનને  છે નહીં  ને  પંગુ નથી પણ
ભુજાઓ  નથી  કિન્તુ  હસ્તિનું બળ છે

બધું   યાદ   કરવું   કઠણ   હોય  ત્યારે
બધું   ભૂલવું   એટલું  ક્યાં   સરળ છે ?

સરોવર   સમી   આંખમાં   છે   ઉદાસી
ને  સ્મરણોય  એમાં  ખીલેલાં  કમળ છે!
      
તમારો  અનુભવ  અલગ પણ હશે કંઈ
મને લાગ્યું : આકાશ આખ્ખુંય છળ છે!

હથેળીમાં ઝળઝળિયાં ટપકી પડ્યાં છે
તો  પંડિત વદ્યા  કે, આ ઈચ્છાનું ફળ છે

એ   નજદીક  છે  એક  હલેસાં  સુધી
તસુભાર   એનાથી   આઘે   વમળ  છે !

          ભરત ભટ્ટ