સૂકાં ભેગું લીલું બળશે ખબર કોને હતી એવી!
હૃદયને મન સ્વયં છળશે ખબર કોને હતી એવી!
તરસ તો ક્યારનીયે જઈ ખૂણામાં શાંત બેઠી છે,
અહીં તૃપ્તિ જ ટળવળશે ખબર કોને હતી એવી!
અમે તો આંગણે સત્કારવા ધાર્યું હતું એને,
મરણ રસ્તે જતાં મળશે ખબર કોને હતી એવી!
અડીખમ પર્વતો જેવા કદી આ નિશ્ચયો સઘળા,
બરફની જેમ ઓગળશે ખબર કોને હતી એવી!
કર્યાં કંઈ કેટલાં તપ કે ફળે એકાદ ઈચ્છા પણ,
અનિચ્છાઓ જ સૌ ફળશે ખબર કોને હતી એવી!
- બાબુલાલ ચાવડા 'આતુર'
No comments:
Post a Comment