ગીત

એક આળું ગીત

ચૈતરની ડાળીએ હિંચકો રે બાંધ્યો
એનાં હલ્લેસાં છાતીમાં વાગ્યા હબ્બેસ

મૂંઇ ,હું તો મોગરો બનું કે બનું જૂઇ ?
ધડધડ ધબકારા ઊંચા-નીચાં ચીતરાયા
પાણીનાં રેલાં શી વહેતી રે કાયા
હું તો ટગલી ટચાક્ જેવી નાજુકડી નાર
મારાં લાંબા થિયાં રે પડછાયા !
આંધળી ભીંતોને પછી આંખો ફૂટી
જુએ ખીંટીએ ટીંગાતો ટગર ખેસ...

મૂંઇ, હું તો મોગરો બનું કે બનું જૂઇ ?
પાલવ અડે ને થાય ઉઝરડાં લોહીઝાણ
જાણ એની કોઇને ક્યાં જાણ ?
સપનાં સંધ્રુકી હું તો રાંધું કંસાર
આપે મોતીડાં એનાં પરમાણ...

મારાં ફળિયાએ વેર જૂનું લીધું રે લોલ
મેં જ મુંને ઠેબે ચડાવી હંમેશ...
મૂંઇ, હું તો મોગરો બનું કે બનું જૂઇ ?

-અનિલ વાળા