જન્મદિન મુબારક..🌹
ખાલી બેડલું વાટ જુવે છે, વ્હોરનારું કોઈ આવે,
ભવના તરસ્યા પંડને કોઈ , કંઠ લગી છલકાવે.
નેહના છલકે નીર છલોછલ, વાટ એ જોઈ રહેલું,
હળવે હાથે અળગું મેલે , બેડલું તૈડ પડેલું.
પીંડ માટીનો ચાકડે ચડતો , ધરતો જુદા ઘાટ,
પાકતો અગનઝાળમાં એને વેચવા મેલ્યો હાટ.
અણગમતાને કોઈ અડે નહીં , ગમતું શોધે સહુ,
ભાવ પૂછે કોઈ ભાવ ન પૂછે આવતું ઓછું બહુ.
એક નિંભાડો , એક છે માટી , ઘડનારો છે એક,
ઘાટ ઘડે છે જૂજવા તોયે ધ્યાનમાં છે પ્રત્યેક.
પાક્યા મેલે તોય રહે છે કોઈ પાકા કોઈ કાચા,
માણસ , મોતી ,માટલા સહુ મા કોઈ ખોટાં કોઈ સાચાં.
આજ છે ખાલી , કાલ ભરાશે કોઈ મોડું કોઈ વહેલું,
ગૂંચવો તો ના ઉકલે એવું , સમજો તો છે સહેલું.
ક્યું બેડુ છે ભાગમાં કોના, કોણ ભરે, કોણ પીવે ?
કેટલો છે અંધકાર ને કેટલું અજવાળું છે દીવે ?
વ્હોરનારાએ ઘડનારા પર રાખવાનો વિશ્વાસ,
જીવનારાઓ કંઈ ન જાણે , કેટલા, કોના શ્વાસ ?
- તુષાર શુક્લ
No comments:
Post a Comment