સંવાદ - કાવ્ય
કાનજી : ---
તારા અત્તર ભીની સુગંધનાં છાંટા વાગે રે લોલ ,
તારા કામણગારા કાતીલ રૂપનાં કાંટા વાગે રે લોલ
રાધા : ---
તારી આંટાળી પાઘડીનાં આંટા વાગે રે લોલ ,
તારી કડિયાળી ડાંગનાં સુસવાટા વાગે રે લોલ .
શરમની મારી મારી ચુંદડી થઇ જાય લાલમલાલ ,
મારી છાતીની ભીતર ચાલે રોજ કશી ધમાલ ,
એના એક એક ધબકારે ઊભરાય કોઇનું વહાલ ,
તારી વાંકલડી મુછોને 'લ્યા આટલો ના વળ આલ ,
તારી આંખોનાં ઊલાળા અમને વાગે રે લોલ ,
તારી કડિયાળી ડાંગનાં સુસવાટા વાગે રે લોલ .
તારી આંટાળી પાઘડીનાં આંટા વાગે રે લોલ ,
જુએ રોજ દૂરથી પણ પાસ કદી ના આવતો ,
ખબર ન પડે એમ ચોરી છૂપીથી રોજ નિહાળતો ,
કહીએ મળવાનું તો ખોટા બહાનાં એ બતાવતો ,
સપનામાં આવીને અમથા અમથા લાડ લડાવતો ,
તારા આવા ચેનચાળા હવે અમને વાગે રે લોલ ,
તારી કડિયાળી ડાંગનાં સુસવાટા વાગે રે લોલ .
તારી આંટાળી પાઘડીનાં આંટા વાગે રે લોલ ,
કાનજી : ---
ગયો છું થાકી હવે તારા નખરાંથી નીતનવા ,
લાવું ક્યાંથી હવે એવા મેઘધનુષિ રંગો અવનવા ,
ગયાં છે હવ ખુટી શબ્દો 'જશ' તને અભિનંદવા ,
તારા રૂસણાનાં અબોલા અમને વાગે રે લોલ .
તારા અત્તર ભીની સુગંધનાં છાંટા વાગે રે લોલ ,
તારા કામણગારા કાતીલ રૂપનાં કાંટા વાગે રે લોલ
રાધા : ---
તારી આંટાળી પાઘડીનાં આંટા વાગે રે લોલ ,
તારી કડિયાળી ડાંગનાં સુસવાટા વાગે રે લોલ .
કાનજી : ---
તારા અત્તર ભીની સુગંધનાં છાંટા વાગે રે લોલ ,
તારા કામણગારા કાતીલ રૂપનાં કાંટા વાગે રે લોલ
જશુ પટેલ
૨૯-૦૬-૨૦૧૭
બોસ્ટન , અમેરીકા
No comments:
Post a Comment