ગઝલ

ફુલ છે તું ડાળની સામું ન જો,
આંખે અશ્રુમાળની સામું ન જો,

દોડે આપોઆપ આ રસ્તો અહીં,
ઓ ચરણ! તું ઢાળની સામું ન જો,

પાંખ તારી ક્યાં સલામત છે ભલા,
આભ જો તું,જાળની સામું ન જો,

ચાલતો રે' જે ખભે સુખ ઉંચકી,
દુઃખના વૈતાળની સામું ન જો,

ફુંકશે ચાડી કપાળે કરચલી,
તું હવે ઘડિયાળની સામું ન જો,

છે હલેસાં હાથ તારા તો પછી,
નાવ જો પેટાળની સામું ન જો.

મૃત્યુના એ દેવતા છે સાચુ પણ,
શિવ જો તુ કાળની સામું ન જો.

શૈલેષ પંડ્યા