સાલ્લુ નવોઢાનું હૈયું - ગીત
સાજ સજેલા ખોરડા વચ્ચે ધબક્યું સાલ્લુ હૈયું,
ફૂલપથારી પર બેસીને હલક્યું સાલ્લુ હૈયું.
બંધ બારણે નજરને ટાંગી
સાંકળ થઈને ખમકે,
ધીમાધીમા પગરવ ભાળી
પાંપણ હેઠળ ચમકે,
ભોગળરવમાં ઘૂંઘટ આડે મલક્યું સાલ્લુ હૈયું.
સાજ સજેલા ખોરડા વચ્ચે ધબક્યું સાલ્લુ હૈયું.
શરમશેરડા ગાલે ટહુકી
પાનીલગ જઈ ઊતર્યા,
મણમણ તાળાં જીભે લાગ્યા
વેણ એકે ન ઊચર્યા,
ભીનાઊના ધસમસ શ્વાસે થડક્યું સાલ્લુ હૈયું.
સાજ સજેલા ખોરડા વચ્ચે ધબક્યું સાલ્લુ હૈયું.
- મુકેશ દવે
No comments:
Post a Comment