છંદ

🌿🌿आयो नह असवार🌿🌿

नयन फिका नीची नजर,प्रीत गई परवार।
सावण आवण कह गयो,आयो नह असवार।।

विरहन मन री वेदना,आंसू धारोधार।
कह सखी अब किणने कहुं,आयो नही असवार।।

मन हिरन वन वन डोलत ,नह जीवन मे सार।
बन ब्याध अर मारन आ,(पण) आयो नह असवार।।

तन मन वीन झंकारन,सतणा बांधन तार।
मधुर धुन बजावन कज्ज,आयो नही असवार।।

जौवन जळ भंवर पड्या, पड़सी कीकण पार।
बांह पकड़ ऊबारवा, आयो नह असवार।।

धन कमावन छोड़ी धर, गयो समंदर पार।
धण केश अब धवल हुआ,आयो नह असवार।।

आश तज पिय आवन की,बैठी हिवड़ो हार।
नित निशासा नाख रही,आयो नह असवार।।

नयन वाट निरखै किकण,आंख्या आंसू धार।
धण दीठ धुंधली हुई,आयो नह असवार।।

जौवन दुश्मन जोरावर,लियां विरह तलवार।
बैरी सुं  बचावन को,आयो नह असवार।।

सयधण सूरत पांतरी,बीती केतिक वार।
बरस कईयक बीतगा,आयो नह असवार।।

🌿🌿आयो जद असवार🌿🌿

ओठी दीठो आवतो,नणदल रे उणियार।
पणिहारी वा पांतरी,आयो जद असवार।।

बण ठण बैठी गौरड़ी, नयणा काजल सार।
सेज बिसाई सांतरी,आयो जद असवार।।

बिरह अगन बुझ गई अब,बरस्यो धारोधार।
नेह नीर नाळा बहे,आयो जद असवार।।

डूंगरिया हरिया हुआ,जाण सुरंगी नार।
सरोवर नीर छलकियां,आयो जद असवार।।

शंभुसिंघ बावरला
🌿🌿🌿🌿🌿🌿