ગીત

*ગીત*

હૈયાની હેલીમાં ભર્યું છે પ્રેમનું છલોછલ હેમ,
પૂછતાં નહીં હોં .....કે,
આવું બધું બોલતાં તને આવડી ગયું કેમ!?

શૈશવનાં આંબાની છાયામાં બેસીને,
મુઠ્ઠીમાં સાચવેલી યાદોને હળવેકથી ખોલીને મેં,
બે ઘડી પંપાળી, હોઠે લગાડીને,આંજી લીધી દીવાની જ્યોતની જેમ...
પૂછતાં નહીં હોં ....કે,
આવું બધું બોલતાં તને આવડી ગયું કેમ!?

છાતીનાં પોલાણે રાહ જોઉં જેની,
હવા લઈ આવી છે સંદેશ મારા એ ની,
વીંટળાઈ ગઇ સુગંધ એની મને,વેલીની જેમ...
પૂછતાં નહીં હોં ....કે,
આવું બધું બોલતાં તને આવડી ગયું કેમ!?

શું હતું એ,કે બદલાઈ ગયું સઘળું ભીતર!
એ ફૂલ હતું કે હતું અત્તર,?
મૂંગી મંતર થઇ પછી હું ભાનમાં આવી જેમતેમ,...
પૂછતાં નહીં હોં ...કે,
આવું બધું બોલતાં તને આવડી ગયું કેમ!?

હૈયાની હેલીમાં ભર્યું છે પ્રેમનું છલોછલ હેમ,
પૂછતાં નહીં હોં ...કે,
આવું બધું બોલતાં તને આવડી ગયું કેમ.

*કાજલ કાંજિયા "ફિઝા"*