ગઝલ

તજી   પ્રણાલી,  પરંપરા, હું  પટમાં  આવું   છું
સજી શબદ શણગાર નવા ઘટ-ઘટમાં આવું છું

પવન પરાગી,કોમળ લય,લયતાન બની જઈને
ફર-ફર   ફર-ફર  રેશમ-રેશમ લટમાં  આવું  છું

અનહદ  નાદે  ધૂળ  રસ્તાની ભગવો  રંગ   ધરે
પગલે   પગલે   હું   વૈરાગી  વટમાં  આવું    છું

મારી  અંદર  ગોપી  થઈને  મટુકી  કોણ  ભરે !
ગુપત  સરોવર-પનઘટ  પર પરગટમાં  આવું છું

ઝાંઝ નહિ પખવાજ નહિ કરતાલ કશું ક્યાં છે !
મન-મંજીરે   મૌન  બજી  રમઝટમાં  આવું  છું

.. સુરેન્દ્ર કડિયા