ગીત

☘☘☘☘☘☘☘☘☘☘

ધૂન લઈને ચાલ્યા

હવે અમે આ સહજ સહજની ધૂન લઈને ચાલ્યા રે
રૂનાં પગલે રૂના ઢગલે ચકમક તણખા ઝાલ્યા રે

ભૂલી સ્વ સાનભાન હળવા હાથે ફોરાં ઝીલ્યાં રે
દશદશ દ્વારબંધ કરીને દશેય આંગળીએ ખીલ્યા રે
કેડી તરુવર સીમ સીમાડા ભીનાં સ્મરણ ટાળ્યાં રે
હવે અમે આ સહજ સહજની ધૂન લઈને ચાલ્યા રે

સરવર મૂક્યાં, નદિયું ચૂક્યા, સાતેય સાગર તર્યા રે
અરમાન નીચાં ઊંચાં થઈને ખરખર ખરખર ખર્યા રે
અમથું નાનું બીજ જતન થૈ ગુલાબ પૂરાં ખીલ્યાં રે
હવે અમે આ સહજ સહજની ધૂન લઈને ચાલ્યા રે

ડૉ. ભાવેશ જેતપરિયા

☘☘☘☘☘☘☘☘☘☘