*પલ |હૃદયનો સીધો અનુવાદ*
અમથે અમથું પગને કાં પંપાળ્યા કરશું ?
અમને સાલું એમ હતું કે ચાલ્યા કરશું.
રસ્તામાંથી રસ્તો, રસ્તે મબલખ ફાંટા,
રસ્તાનો પણ રસ્તો કાઢી મ્હાલ્યા કરશું.
મૂંઝાશે મન મ્હેંકી મ્હેંકી ત્યારે ખરશું,
હાલ અમે તો ફૂલ્યા કરશું- ફાલ્યા કરશું.
છો ને ઈશ્વર લાંબું લાંબું પેપર કાઢે,
ખાલીજગ્યા ભરશું - પ્રશ્નો ટાળ્યા કરશું.
પીંડે પીંડે તું એ જુદો - હું યે જુદો,
જૂદા-જૂદા ક્યાં સુધી મન વાળ્યા કરશું.
પીડાનાં પચરંગી વાઘા પ્હેરી ભીંતે-
ચિતરેલા દરવાજે મન ટીંગાળ્યા કરશું.
જીવને સાલી ગરમી હાડોહાડ ચડી છે,
ભીતરની ભઠ્ઠીમાં *હું* ઓગાળ્યા કરશું.
*આલાપ*
#CM_Sarkaar
No comments:
Post a Comment