ગઝલ

વસંતનો વૈભવ

વનવગડે રંગોનો છટકાવ વસંતની સેના આવી
કેસુડે કેસરિયો પ્રભાવ વસંતની સેના આવી

માનવમનની ગહેરાઇઓમાં ઝિલમિલ ઝિલમિલ ટહુકે
લહેરાયો વાસંતી સ્વભાવ વસંતની સેના આવી

ઠૂંઠી ડાળે કુંપળ ફૂટી હરિયાળો રંગ ઝલકે
પત્તે પત્તેથી ભાગ્યો કુભાવ વસંતની સેના આવી

હરખની હેલી ઉમટી હૈયામાં કેસરિયો રંગ છલકે
ના નડયો કોઇ અભાવ વસંતની સેના આવી

ગણગણતા હોઠેથી છલકી મસ્તી આવી બેઠી પલકે
નયનોમાં છવાયો ત્રિભાવ વસંતની સેના આવી

અરસિક મનનેય રસ તરબોળે, રસિક મન તો મલકે
પ્રેમનો શિરસ્તો તો નિભાવ વસંતની સેના આવી

ભીતર ભીતર રસ છલકતી સલૂણી સાંજ ઢલકે
પરસ્પર જાગ્યો  *તું ભાવ* વસંતની સેના આવી
........ સરલા સુતરિયા ......