ગઝલ

*બાબાસાહેબને... -પ્રકાશ પરમાર

એની વિશાળતાનો તને ક્યાં ક્યાસ છે ?
માપ ના, એ આખેઆખું આકાશ છે.

વિચારરૂપે આજે પણ રહે એ ઝળહળી ;
સદા અંધારાને ઉલેચતો પ્રકાશ છે.

ગાયકવાડી મદદના ગાણાં ઘણાં થયાં;
વડોદરાએ ક્યાં તને દીધું આવાસ છે.

ધર્મોની પસંદગી ના હોય જન્મથી ;
માનવતાની વાત જ ખરી ને ખાસ છે.

બુદ્ધની શુચિપૂર્ણ શુધ્ધતા છે સમ્યક ;
જડ ક્રિયાકાંડો તો નર્યો ઉપહાસ છે.

'ભીમરાવ' નામ અને કામથી છે મહાન;
પ્રસરાવી તેં સમાનતા નામની સુવાસ છે.

અભ્યાસ,પુસ્તકો અને સંસોધનો સંતૃપ્ત;
વિદ્વત્તાનો એ જ વ્યાપક પ્રવાસ છે.

જનતંત્રને અદકેરું સ્થાન આપ્યું માનભર;
એટલે જ અમને તારો વિશ્વાસ છે.

હાથી-અંબાડી ચડી તાજ પણ લીધાં;
તારું નામ વટાવે એ બદમાસ છે.

ઉજવીએ તમારી જન્મજયંતી અમે શી ?
સુર્ય સામે દીવો ધરવાનો પ્રયાસ છે.