ગીત

*ગીત - ચોમાસુ આવ્યું*
*(શ્રી ર.પા.ની છાંયામાં લખાયેલ આ ગીત)*
ચોમાસુ આવ્યું ને, ચોમાસુ જામ્યું ને,
ચોમાસુ થઈ ગ્યું પલાણ તારા શ્વાસમાં,
પછી લીલાં ખેતર થઈ, લીલા જંગલ થઈ,
લીલા ઉભરાણ મારા શ્વાસમાં.

લીલા અજવાસમાં લીલુંછમ્મ તરણું
ઊગી ગયાનું સૌ જાણે,
લીલુછમ્મ સરવર આંખોમાં રમતું ને
તૂટી ગયાનું સૌ જાણે,
છોને આંખોને બંધ કર; આંખો ઉઘાડ તોય
લીલા છવાણ તારા શ્વાસમાં,
પછી લીલા ઉભરાણ મારા શ્વાસમાં.

ભીના વંટોળમાં આખુંએ આભ જઈ
ભીના ગુલાબને સૂંઘે,
ગૂણગૂણના સાદમાં આખું ગુલાબ લઈ
ડાળડાળ ભ્રમરો ગૂંજે,
ઓલી છૂટતી - વછૂતી ભીનેરી મ્હેંકના
લીલા લખાણ તારા શ્વાસમાં,
પછી ભીના ઉભરાણ મારા શ્વાસમાં.
- મુકેશ દવે