ગઝલ

*27L ગઝલ*

લીટી હોય પૂરતી ને ફકરા કરે છે !
વિધાતા લલાટે અખતરા કરે છે !

જૂના  થૈ ગયા છે છતાં શ્વાસ હમણાં
નવી વહુ કરે એવાં નખરાં કરે છે.

સ્મરણ કે' છે- 'અમને મૂકો દાબડીમાં' ,
પછી દાબડીમાંથી ડબરાં કરે છે.

ઘણીવાર પુષ્પોની સાથેનાં શબ્દો,
અપાયેલ પુષ્પોને પથરા કરે છે.

ફુલો બન્ને સાથે ફકત પ્રેમ કરતાં !
દગો તો પતંગિયા ને ભમરા કરે છે.

સરળતાથી સંબંધમાં સ્વાર્થ ઘૂસી,
તદન સ્હેલાં સંબંધને કપરાં  કરે છે.

ઝૂલો લાગણીનો બનાવે છે મા-બાપ,
ને ધબકાર-શ્વાસોનાં ઘુઘરા કરે છે.

આ વોટ્સે'પ, યુટ્યૂબ,ટ્વિટર ને ફેસબુક !
જુઓ ! કેટલાં કામો નવરા કરે છે !

   ~ ડૉ.મનોજ જોશી 'મન'
         ( જામનગર )