વાત વે'તી થાય છે, પાગલ ન બન,
ચોતરફ ફેલાય છે પાગલ ન બન.
કાન સરવા થાય છે દીવાલના
ને પવન પણ વાય છે, પાગલ ન બન.
હું ફકીરીના નશામાં કેદ છું,
તું મદીરા પાય છે, પાગલ ન બન.
મૌન ખુદ વાચાળ ને તે છતાં
ગીત શાને ગાય છે? પાગલ ન બન.
કોણ કોને સાથ આપે એ બધું,
અવસરે પરખાય છે, પાગલ ન બન.
ખ્વાબ માં પણ તું હવે ના આવજે,
લોક સમજી જાય છે, પાગલ ન બન.
કોણ પાગલ થઇ ગયું એ જાણવા,
'પુષ્પ ' ગોથા ખાય છે, પાગલ ન બન.
---- પબુ ગઢવી 'પુષ્પ '
No comments:
Post a Comment