ગઝલ :- ધારવાનું બંધ કર
--------------------------------
કંઇ કશું તું ધારવાનું બંધ કર.
આંખથી તું મારવાનું બંધ કર.
જ્યાં કદર ના હો લગીરે આપણી,
લાગણી ત્યાં સારવાનું બંધ કર.
આંખનો વિસ્તાર મોટો કર હવે ,
કેડીઓ કંડારવાનું બંધ કર.
છે હકીકત એ મુજબ તું જીવજે ,
સ્વપ્ન ને શણગારવાનું બંધ કર.
માત ખાશે એક ' દિ મારી કને,
પ્રેમને પડકારવાનું બંધ કર.
હર વખત સાથે હશે તારી ' ધમલ'
બસ બધું વિચારવાનું બંધ કર.
-- દેવેન્દ્ર ધમલ
No comments:
Post a Comment