ગઝલ

લગાગા લગાગા લગાગા લગા

છલોછલ પ્રણયથી ભરેલો છું હું,
હૃદયમાં એ કારણ વસેલો છું હું.

મહેચ્છા કરો છો સદા જેની એજ,
સિતારો ધરા પર ખરેલો છું હું.

અપેક્ષા બિછાવો ઝરૂખે હવે,
મિલનની દિશામાં વળેલો છું હું.

મળી પ્રેમની હૂંફ જ્યારે મને,
બરફ સમ તરત ઓગળેલો છું હું.

સુગંધિત થયો છું સુમનથી વધું,
અછડતો તને જઈ અડેલો છું હું.

ફસાવ્યો હતો જિંદગીએ છતાં,
ગઝલને લખીને બચેલો છું હું.

કલાને હૃદયમાં જરા વાવી તો,
બનીને ગઝલ પાંગરેલો છું હું.

-- દિલીપ ચાવડા (દિલુ) સુરત